مدرسہ کمیونٹی

جامعہ انوارِ مدینہ ہاسن میں رابطہ مدارس اسلامیہ صوبہ کرناٹک کے وفد کی ہاسن کے علماء سے ملاقات
الحمد لله بروز جمعرات بتاریخ ۱۷/۰۹/۲۰۲۶ جامعہ انوار مدینہ ضلع ہاسن میں جلسہ دستار بندی و تقسیم اسناد اور تحفظ ختم نبوت کا پروگرام تھا۔ اس جلسہ میں مہمان خصوصی حضرت مولانا سلمان بجنوری صاحب دامت برکاتہم تھے جبکہ ۸؍اضلاع سے علماء کی شرکت رہی۔ نیز بنگلور سے رابطہ مدارس اسلامیہ کے وفد کی بھی شرکت رہی جس میں حضرت مولانا مفتی شمس الدین بجلی صاحب قاسمی دامت برکاتہم ( صدر رابطہ مدارس اسلامیہ کرناٹک ) کے ساتھ حضرت مولانا ریاض صاحب اور جناب حاجی اشتیاق صاحب شامل تھے۔اس موقع پر صدر محترم دامت برکاتہم نے علماء کرام کے سامنے رابطہ مدارس اسلامیہ صوبہ کرناٹک کی موجودہ سرگرمیوں اور آئندہ کے منصوبوں پر روشنی ڈالتے ہوئے فرمایا کہ ان شاء اللہ امسال صو بہ کرناٹک کے تحت مدارس کے طلبہ کا اجتماعی امتحان منعقد کرنے کا ارادہ ہے۔ اس سلسلے میں شعبۂ حفظ و ناظرہ کے طلبہ کا اجتماعی امتحان لیا جائے گا، جبکہ درس نظامی کے طلبہ کے لیے ہدایۃ النحو اور علم الصیغہ کو بنیاد بناتے ہوئے نحو و صرف (فن ) کا امتحان ہوگا۔
نیز حضرت صدر محترم نے کہا کہ اجلاس مجلس عاملہ میں حضرت مولانا شوکت صاحب بستوی دامت برکاتہم نے صوبہ کرناٹک کے مدارس کی ڈائیر کٹری بنانے کی بات کہی تھی ، اسی وقت ہم نے ان سے ویب سائٹ بنانے کی منظوری حاصل کر لی ۔ الحمد للہ ویب سائٹ تیار ہو رہی ہے۔ پھر اس کے فوائد اور سہولتوں کو سامنے رکھا تو تمام علماء نے اس اقدام کو بہت سراہا اور خوشی کا اظہار کیا۔ بفضلہ تعالی یہ جوڑ بڑا کامیاب رہا اور مفید ثابت ہوا۔ اللہ رابطہ مدارس اسلامیہ کی ان کاوشوں کو قبول فرمائے اور مزید ترقیات سے مالا مال فرمائے ۔ آمین